به گزارش روزپلاس، هیئتی از مقامات تاجیکستان به ریاست معاون استان «ختلان» به ولایت قندوز در شمال افغانستان سفر کرده و با «حبیب‌الرحمان صهیب» معاون والی قندوز دیدار و گفتگو کرده است.
در این نشست، معاون استان ختلان با ابراز تمایل به گسترش همکاری‌های دوجانبه، گفت: «دولت تاجیکستان به هیچ مخالف امارت اسلامی اجازه فعالیت در خاک خود نمی‌دهد و متعهد به حفظ روابط نیک با کابل است.»
وی افزود که دوشنبه خواستار تقویت روابط در زمینه‌های تجاری، اجتماعی و امنیتی است و کنترل مرزهای مشترک را برای امنیت منطقه حیاتی می‌داند.
حبیب‌الرحمان صهیب نیز در این دیدار اظهار داشت که افغانستان خواستار روابط بر پایه احترام متقابل با همه کشورهای همسایه، به‌ویژه تاجیکستان است.
معاون والی قندوز همچنین تأکید کرد که همکاری‌های منطقه‌ای می‌تواند در تأمین ثبات و رشد اقتصادی دو کشور نقش مؤثری داشته باشد.
روابط افغانستان و تاجیکستان در دو دهه گذشته گاه با تنش‌هایی همراه بوده است. یکی از موضوعات اصلی اختلاف میان دو کشور، حضور برخی مخالفان طالبان در خاک تاجیکستان عنوان می‌شود.
مقام‌های تاجیکستان در ماه‌های اخیر کوشیده‌اند از طریق گفتگوهای امنیتی و همکاری‌های مرزی، این نگرانی‌ها را برطرف کنند.