به گزارش روزپلاس، منابعی در وزارت خارجه حکومت طالبان به رسانه‌ها گفته‌اند که هیئت بلندپایه تاجیکستان تاکنون با «امیرخان متقی» وزیر خارجه دیدار کرده است و به احتمال بسیار این هیئت با «محمد حسن آخند» نخست وزیر و «عبدالحق وثیق» رئیس استخبارات حکومت طالبان دیدار و گفتگو خواهد کرد.
هیئت تاجیکستانی شامل 14 مقام ارشد از جمله مسئولان امنیتی، وزارت خارجه و نهادهای استخباراتی این کشور است و هدف اصلی سفر آنها بررسی و تقویت همکاری‌های سیاسی و امنیتی با طالبان اعلام شده است.
سفر هیئت تاجیکستان به کابل در حالی انجام می‌شود که این کشور در چهار سال گذشته هیچ روابط دیپلماتیک رسمی با طالبان نداشته و سفارت افغانستان در دوشنبه همچنان توسط نمایندگان حکومت پیشین اداره می‌شود.
برخی کارشناسان سیاسی این سفر را نشانه آغاز تعامل محدود تاجیکستان با طالبان و تلاش برای تأمین منافع امنیتی و مرزی می‌دانند.
از مهم‌ترین نگرانی‌های تاجیکستان، تهدیدهای امنیتی ناشی از خاک افغانستان شامل قاچاق مواد مخدر، قاچاق سلاح و فعالیت گروه‌های مسلح اعلام شده است.
تاجیکستان طی سال‌های گذشته به دلیل بی‌ثباتی و حضور گروه‌های مسلح در شمال افغانستان، سیاستی محتاطانه در برابر طالبان اتخاذ کرده بود. پیش از این مقام‌های امنیتی و نظامی تاجیکستان با سفر به پاکستان و دیگر کشورهای همسایه وضعیت افغانستان و تهدیدات مرزی را بررسی کرده بودند. این سفر می‌تواند نقطه عطفی در تعاملات سیاسی و امنیتی میان دو کشور باشد.